Martxoaren 6an izango da eta izen-ematea zabalik da jada
Martxoaren 6an UZ Trail mendi lasterketa egingo da Urretxu eta Zumarragan. Euskadiko Atletismo Federazioaren Euskadiko Trail Txapelketa jokoan egongo da eta Goierriko Kopako lehen proba izango da. Korrikalariak 09:15ean abiatuko dira Areizaga-Kalebarrenetik eta helmuga ere bertan egongo da.
Izen-ematea zabalik da jada, rockthesport.com webgunean. Ibilbide luzeko parte hartzaileek 23 kilometro egingo dituzte (Beloki, Izazpi eta Irimo igoko dituzte). Proba honetan Euskadiko txapela jokoan egongo da. Izen-emateak 20 euro balio du.
12 kilometroko proban, berriz, 23 urte azpikoen Euskadiko txapela egongo da jokoan. Baina adin guztietako korrikalariek parte hartu ahal izango dute. Korrikalariek Beloki eta Izazpi igoko dituzte. Izen-emateak 10 euro balio du. 20 urte azpikoen Euskadiko txapelketa ere egingo da. Hauek Belokira igoko dira eta ondoren herrira jaitsi. Proba honetan 20 urte azpikoek bakarrik parte har dezakete eta izen-emateak 5 euro balio du.
Izena emateko azken eguna martxoaren 5a da. Inoiz baino jende gehiago ari da izena ematen.
