Zaletuen babesa oso garrantzitsua izango da helburua lortzeko
Goierri kirol elkartearen areto futbol saileko gizonezkoen lehen taldeak Hirugarren Mailara igotzeko jokatu zuen larunbatean eta ez zuen helburua lortu. Aretxabaletaren aurkako partidan, berdinketa nahikoa zuen, baina galdu egin zuen. Larunbat honetan bigarren aukera izango du, etxean gainera. 16:00etan jokatuko du, Aldirin, Usansoloren aurka. Berdintzen badu, Hirugarren Mailara igoko da.
Goierri sailkapeneko bigarren postuan dago, Leioa Ibaraki liderraren atzetik. Hirugarren sailkatuari, Basauriko Soloarteri, bi puntuko aldea ateratzen dio. Gainera, goal average-a alde du. Hori dela eta, larunbatean berdintzearekin nahikoa du bigarren postuan sailkatzeko. Herritarrei Aldirira joateko deia luzatu diete.
