Kontratuaren oreka ekonomiko eta finantzarioa berrezartzeko espedientea eta Aquarberi zigor espedientea irekitzea eskatu du
Zumarragako EH Bilduk Aquarbe enpresak «bidegabeki» irabazi duen dirua berreskuratzeko pausoa eman du. Kontratuaren oreka ekonomiko eta finantzarioa berrezartzeko espedientea eta Aquarberi zigor espedientea irekitzea eskatu dio udalari.
EH Bilduk kontzesioak iraun duen bitartean kontratuaren arau hauste «larriak» eta ez betetze administratiboak egiaztatu dituela dio. «Lehenik eta behin, Aquarbek ez du bete Arcelorren itxieraren aitzakiarekin eskatu zuen oreka ekonomiko finantzarioa berrezartzeko prozedurarako kontratua eta oraindik ez ditu kontu auditatuak aurkeztu, legez behartuta egon arren».
Bigarrenik, kontratuaren arabera tasak KPIaren gainetik igo ezin ziren arren, KPIaren gainetik igo ziren. «Gainera, sinatutako kontratua aldatuz, Aquarbek ordaindu beharreko diruaren zenbatekoa murriztu egin zen».
EH Bilduren esanetan, Aquarbek behar baino 900.000 euro gehiago irabazi ditu. «Udalarentzako diru sarreretan murrizketa handia egon da (400.000 euro inguru). Era berean, Aquarbek modu neurrigabe batean fakturatu die herritarrei, bederatzi metro kubikotik gorako kontsumoak tarifa garestienarekin kobratu baititu».
Horrekin, Aquarbek 500.000 euro gehiago irabazi dituela dio EH Bilduk. «Elektrikek energiaren prezioarekin egiten dutena, preziorik garestiena kobratzea, hori da Aquarbek Zumarragan urarekin egin duena».
Alkatearen jarrera salatu dute. «Bere eginkizunei eta Zumarragaren interesak zaintzeari muzin egin die. Udalak ezer egin gabe jarraitzen du. Are gehiago, enpresa justifikatu besterik ez du egin eta uraren zerbitzua pribatizatzen jarraitu du».
Horren aurrean, EH Bilduk dirua berreskuratzeko pausoa eman du. Eta ez du baztertzen goragoko instantzietan beste ekimen batzuk abian jartzea.
Azkenik, PSE-EEri jakinarazi dio ez duela kontratuaren luzapenean udalarentzat aurreikusitako diru sarreretan murrizketarik onartuko. «Aqualia-FCC enpresak (Florentino Perezen jabetza duena) lizitazioaren pleguen aurka jo du eta badirudi prozesua uste baino gehiago luzatuko dela. Ondorioz, gerta daiteke Aquarbek kanon txikiagoa ordaindu behar izatea. Hau guztia ura merkantilizatzearen ondorioa besterik ez da. Ez dugu etsiko herritarrei eta udalari onura ekarriko dien uraren kudeaketa publikoa lortu arte».
