Urola Garaiako Berdintasun arloak Urola Garaiko Emakumeen I. Te-Topaketa antolatu du. Hilaren 15ean egingo dute, 11:15etik 14:15era Urretxuko Pagoeta auzoko eliza izan zen eraikinean. Parte hartu nahi dutenek, izena eman beharra dute. Horretarako, 943 25 23 89 zenbakira deitu behar dute edo berdintasuna@uggasa.eus helbidera idatzi. Zaintza zerbitzua eta arabieratik itzulpen zerbitzua eskainiko dira. Zerbitzu horiek behar dituztenek, eskaria egin beharko dute.
Urola Garaiko Berdintasun arloa bertako emakumeekin eta migratuekin lan egiten ari da, bertakoek beren pribilegioak aitortzeko eta migratuek jasaten dituzten zapalketez jabetzeko. Prozesu horren hurrengo urrats gisa, eskualdeko emakumeen sarea ehuntzen hasi nahi dute feminismoen ikuspegitik. Ibilbide luze baten lehen urratsa izango da. Bertan, elkar ezagutu eta eskubideez eta aldarrikapenez hitz egingo dute, besteak beste. Berdintasuna lortzeko bidean aurrera egin nahi duten Urola Garaiko emakume guztiak gonbidatu dituzte parte hartzera.
