ButaK 21 zineklubak Asghar Farhadi irandarraren Un heroe pelikula emango du bihar (ostirala), 22:00etan, Zelai Arizti aretoan. Pelikula honetako protagonista zor bat ez ordaintzeagatik kartzelan dagoen gizonezko bat da. Baimen batean bere hartzekodunarekin akordio batera heltzen saiatuko da (bere emazte ohiaren aita da), baina ez du lortuko. Bere bikoteak eta biek urrezko txanponez betetako poltsa bat aurkituko dute eta itzuli egingo dute. Hala, heroia bilakatuko da. Gizakiaren sistemaren aurreko babesgabetasunari, gizakien dohainei eta miseriei, masen manipulazioari, gezurraren suntsipen indarrari… buruzko pelikula da. Cannes-eko zinemaldian epaimahaiaren sari nagusia lortu zuen.
