Ados binakako txapelketa nagusiko finalak Beloki pilotalekuan jokatuko dira, 11:30ean hasita
![](https://www.otamotz.eus/site/files/2023/02/pilota-1.jpg)
Igandean Ados Pilotaren binakako txapelketa nagusiko finalak jokatuko dira Zumarragako Beloki pilotalekuan. Promozio mailan, Barrocal eta Larramendik, Zabaleta eta Agirreren aurka jokatuko dute. Lehen mailan, berriz, Gordon eta Oskozek Aranburu eta Intsaustirekin neurtuko dituzte indarrak. Jaialdia 11:30ean hasiko da eta Hamaika Telebistak zuzenean emango du. Sarrerek 10 euro balio dute. Haurrak doan sartuko dira.
Finalak gaur aurkeztu dira, Beloki pilotalekuan bertan. Mikel Serrano alkateak finalak hartzea Zumarragarentzat “ohorea” dela esan du eta ekitaldia martxoaren 8ko programaren barne antolatu dutela gehitu du. Aurkezpenaren ondoren, pilota aukeraketa egin dute.
Aurkezpenean eta pilota aukeraketan igandeko finaletan jokatuko duten bost pilotarik parte hartu dute: Aranburu, Intsausti, Barrocal, Zabaleta eta Agirrek.