![](https://www.otamotz.eus/site/files/2023/07/4032412c-4cc0-44e0-b00d-8fa52305d975_16-9-discover-aspect-ratio_default_0_x2682y1359.jpg)
Nicolas Alustizak (Zumarraga, 2003) Euskaltel-Euskadi taldearekin fitxatu du hurrengo bi denboraldietarako. Alustizak Euskadi fundazioaren bigarren taldetik (Laboral Kutxa) lehen taldera salto egin du, denboraldi bikain baten ostean. 2023an lau garaipen lortu ditu. Azkena, joan zen asteburuan, Antzuolan. Euskaltel-Euskadin herrikide batekin arituko da: Xabier Isasa urretxuarrarekin.
Alustiza Industria Antolakuntza Ingeniaritza gradua ikasten ari da Mondragon Unibertsitatean. 2022an lepauztaia hautsi ondoren, 2023an bere dohainak erakusteko aukera izan du. Apirilean Duranan nagusitu zen, maiatzean Iturmendin eta ekainean Seguran. Gainera, laugarren izan zen Legazpiko Santikutz klasikoan, bosgarren Lazkaon, hamargarren Valenciagan eta hamaikagarren Bidasoako Itzulian eta Gorlako Igoeran. Gazte mailara arte Goierri kirol elkartearen taldeetan aritu zen. Igotzailea da eta talde txikietan oso ondo moldatzen da.
Zumarragarra oso pozik ageri da. “Fitxaketa honek asko esan nahi du niretzat, iraunkortasunaren eta lanaren sinonimoa baita. Eta etxeko taldearekin bi urtetarako sinatzea erabateko ametsa da. Azken bi denboraldietan Laboral Kutxan aritu naiz. Oso ondo eraman dute nire kirol ibilbidea eta profesional mailara igarotzeko funtsezko balioak irakatsi dizkidate. Helburu nagusia bizikletaz gozatzea izan da”.
Ilusi handia duela eta datozen bi urteetan ikasten eta gozatzen jarraitu nahi duela gehitu du. Eskerrak eman dizkie inguruko guztiei. “Eskerrak eman nahi dizkiet lagunei, familiari eta Fundazioari, eman didaten aukeragatik. Iaz urte txarra izan nuen, bizikleta utzi eta taldekideei agur esan nien udan, baina taldeak ni babesten jakin zuen eta bide onetik gidatu ninduen. Dohainak ditudala eta bizikleta uztea pena izango zela uste zuten… eta arrazoia zuten”.
Orain arte bere zuzendaria izan zen Mikel Gaztañaga itsasondoarra ere pozik ageri da. “Nicolas berezko irabazlea da. Gazte mailan ere erakutsi zuen hori. Denboraldi erdian lepauztaia hautsi zuen arren, gero nagusitu egin zen. Iaz, gurekin eman zuen lehen urtean, ondo hasi zen, baina berriro ere lepauztaia hautsi zuen. Aurten, ordea, denboraldi hasieratik erakutsi ditu bere dohainak: oso ondo igotzen da eta ondo moldatzen da taldeetan eta ihesaldietan. Gainera, taldekide ona da, giro ona ematen dio taldeari, eta lasterketan oso azkarra da, ez da ezkutatzen eta beti aurpegia ematen du”.
Jorge Azanza Euskaltel-Euskadiko kirol zuzendariak ere Alustiza irabazlea dela azpimarratu du. “Nicok bere kalitatea erakutsi du denboraldi hasieratik. Erregularra eta irabazlea da. Aukerak baliatzeko behar den abiadura du eta txirrindulari handia izateko behar den izaera dauka. Dena du, orain pixkanaka hazi behar du, bere ibilbidea osatu behar du profesional handi bihurtzeko”.