Bi-Tartean merkatari elkarteak Gabonetako lehen Ostiral Magikoa egin du. 17.00etan tonbola ireki du eta 17.30etik aurrera herritarrek Olentzerorekin eta Mari Domingirekin argazkiak ateratzeko aukera izan dute. Argazkilari bat egon da eta hurrengo egunetan argazkiak dendetan banatuko dira eta jendeak berea topatu beharko du etxera eraman ahal izateko. Argazkia ateratzen dutenen artean txokolatea eta txurroak hartzeko tiketak banatu dira.
Tonbolan sari asko banatuko dituzte. Boletoak kanpainara atxikitako dendetan banatzen ari dira, erosketak egiten dituztenen artean. Tonbola urtarrilaren 5era arte egongo da zabalik: astelehenetik ostiralera 17.00etatik 20.00etara eta larunbatetan goiz eta arratsaldez.
Tonbolan jokatu duen lehen herritarrak urdaiazpiko bat irabazi du eta beste batek Goierri Busek emandako maleta eraman du etxera. Egunero opari potoloak eta merchandising produktuak banatuko dituzte parte hartzaileen artean.
