Aldundiaren Gipuzkoan Gazte Tour 2024 egitasmoaren Zumarragako kontzertuan joko du, Kulto Kultibo eta Ayveerekin batera
Argazkia: Gaztea Aurten ere Gipuzkoan Gazte Tour birako jaialdietako bat Zumarragan izango da. Urriaren 11n dantza ikastaroa egingo dute eta urriaren 12an kontzertua. Kontzertuan AimarZ (Aimar Zuriarrain) zumarragarrak parte hartuko du, Kulto Kultibo eta Ayveerekin batera.
Gipuzkoan Gazte Tour aldundiak antolatzen du, hainbat udalekin lankidetzan. Zumarragak 2018tik parte hartzen du.
Aurten bi ekitaldi izango dira Zumarragan. Urriaren 11n, Sarai Santano koreografo eta dantzariak ikastaroa egingo du Gure Txoko jubilatuen etxeko laugarren solairuan. 18:00etan hasiko da. Herriko gazteek dantza garaikidea ikasteko aukera izango dute. Parte hartu nahi dutenek udalaren webgunean edo kultur etxean eman dezakete izena.
Urriaren 12an, 20:00etan, kontzertua egingo dute Izazpi auzoko kantxa estalian. Ayvee abeslariak, Irungo Kulto Kultibo rap eta reggae taldeak eta Aimar Z zumarragarrak parte hartuko dute. AimarZ-k bere lehen EPa aurkeztuko du: Mi Core.
