Txirimiriko bazkideak, aurten Gesaltza Añanara egin duten txangoan. Urretxuko Txirimiri elkarte gastronomikoak 50. urteurrena ospatuko du azaroan. Hainbat ekitaldi antolatu dituzte azaroaren 8rako eta 9rako. 8an, 19:00etan elkartean bertan, Txirimiriren 50. urteurrenari buruzko liburua aurkeztuko dute. Ekitaldia amaitutakoan, ale bana emango zaio bazkide bakoitzari. 20:00etan elkarteen arteko mus txapelketa jokatuko da.
Urteurrenaren egun nagusia azaroaren 9an izango da. 13:00etan, bazkideei harrera egingo diete Mendiaraz Anaiak txalapartarekin. Bazkideek aperitibo bat dastatuko dute eta zapi oroigarriak banatuko dira. 13:30ean bazkide gazteenak eta zaharrenak elkartearen bandera igoko dute. Jarraian, ohorezko aurreskua dantzatuko diete bazkide sortzaileei. Gainera, oroigarri bana emango diete. 14:00etan bazkideek argazkia egingo dute elkartearen aurrean eta ondoren bazkaria egingo dute. Bazkalostean, Txirimiri abesbatzaren emanaldia izango da. Abesbatza ospakizun horretarako propio sortu dute.
Txirimiriko bazkideak, 2001eko Santa Anastasia jaietako Kuadrillen Egunean.
