Urretxurekin anaituta dagoen Schwarzenbruck herrira joango dira eta sormena landuko dute Alemaniako gazteekin
Ostiral honetan, 04:30ean, 18 laguneko taldea Urretxutik Alemaniako Schwarzenbruck herrira abiatuko da, udalen arteko Erasmus+ programaren eskutik. Urretxuko Udaleko Gazteria Sailak koordinatutako ekimen honetan, 15 neraberekin batera hiru arduradun joango dira. Eguerdi aldera, Schwarzenbruckera iritsitakoan, beste 18 laguneko taldeak egingo die harrera. Guztiek astebeteko egonaldia egingo dute bertan. Sormena landuko dute, hori baita egitasmoaren ardatza.
Sormonaken azken ekitaldian parte hartu, proiektua aurkeztu eta interesa agertu zuten 41 lagunen artean zozketa egin da parte hartzaileak aukeratzeko. Genero oreka aintzat hartu da. 14 eta 18 urte bitarteko nerabeak dira.
Sormena landuko dute, Urretxuko Gazteria sailak Europan aurkeztutako elkartrukearen ardatza sormena baita: ez arteari edota kulturari dagokionez bakarrik, baita gainontzeko esparruei lotuta ere. Hala, astebeteko egonaldian, sormenari lotutako ekintzak egingo dituzte elkarrekin: arte, diseinu eta teknologiarekin lotutako bisitak eta ikastaroak egingo dituzte, museo, kultur elkarte, enpresa eta bestelako erakundeen eskutik.
Sormena ez ezik, Schwarzenbruck eta Nurenberg inguruko historia, kultura eta naturguneak ezagutuko dituzte, bertako adin bereko biztanleen eta bi hirietako elkarte eta eragileen eskutik. Hori guztia era ludiko eta gozagarrian egingo dute. Eta nola ez, bi taldeek aisialdirako aukera ere izango dute. Urretxuko Udalaren webgunean egunez eguneko jarraipena egingo dute, argazkien eta testu laburren bitartez. Urrian, alemaniarrak Urretxura etorriko dira.
Alfonso Cuesta
Udalak asteartean eman zuen bidaiaren berri, gazteekin eta beraien gurasoekin egindako bileraren aurretik. Prentsaurrekoan Maialen Fidalgo zinegotziak eta Beñat Zamalloa Gazteria teknikariak parte hartu zuten. Fidalgok Urretxu eta Schwarzenbruck nola anaitu ziren azaldu zuen. «Harreman horren hazia Urretxuar batek jarri zuen, Alemanian bizi zen Alfonso Cuestak, 1988an, bi herriok, Urretxu eta Schwarzenbruck elkar ezagutzera eman zituenean eta senidetzaren aldeko lanari ekin zionean. Lan horren ondorioa izan zen 1991n bi herriek sinatutako senidetza hitzarmena, Albert Frister eta Ramon Arbizu alkateek sinatu zutena».
Harrez geroztik, hamaika joan-etorri egin dituzte urretxuarrek Alemaniara eta alemaniarrek Urretxura: kirol txapeleketetara, hizkuntza ikastera, ekitaldi kulturaletara, lanera, eta nola ez, jaietara. «1990eko hamarkada oso emankorra izan zen zentzu horretan, eta elkartruke ugari egin ziren, bereziki gazteen artean, eta gaurdaino dirauten harreman pertsonalak sortu ziren. Ostiralekoarekin, garai hartakoa bezain emankorra izango den etapa bati hasiera eman nahi diogu».
