PANTONALE FESTIVAL 2024 – FRIEDENSTRAUM Gorka Hermosa konpositore eta soinujole urretxuarrak Berlingo (Alemania) Berliner Philarmonie auditorioan joko du bihar, Miran Vaupotic kroaziarrak zuzendutako Pantonale Kammerorchester-eko bakarlari gisa. Bere azken konposizioa estreinatuko du: Hope (itxaropena). Duela urtebete, leku berean, arrakasta handiarekin estreinatu zuen Peace dream obraren ostean interpretatuko da Hope.
Hermosaren konposizio berrian, ukrainar kantu tradizional bat eta errusiar melodia herrikoi bat modu ezberdinetan erlazionatzen dira (borroka, maitasuna, gorrotoa, gerra, itxaropena, meditazioa, infernua…), Beethovenek bere 9. sinfonian erabili zituen Schiller poeta alemaniarraren hitzekin. Apurka-apurka eta oso era sotilean, 9. sinfoniaren ereserkiaren doinua agertuko da, historian zehar hain lotura estua izan duten Errusia eta Ukrainiaren arteko anaitasunaren sinbolo gisa.
Pantonale Kammerorchester-eko eta abesbatzako kide askok guraso errusiarrak dituzten ukrainarrak, aita ukrainarra eta ama errusiarra dituzten errusiarrak… dira. Hermosak gauza arrunta dena politikoek zatitzen eta bereizten saiatzen direla salatuko du.
