Zumarragako Udalak eta Jolasenea elkarteak mahai joko saioak antolatu dituzte, pantailarik gabeko aisialdia sustatzeko. Sei saio izango dira eta bakoitzean jolas bat izango da protagonista.
Saioak igandetan izango dira, 17:00etatik 20:00etara, Zumarragako plazako baserritarren gunean. Hilaren 13an mahai joko modernoak ezagutzeko aukera izango da, maiatzaren 25ean Carcasonne txapelketa jokatuko dute, ekainaren 8an rol jokoak ezagutzera emango dituzte, irailaren 28an lasterketekin lotutako jokoetan parte hartuko dute, urriaren 26an Birus karta jokoan arituko dira eta azaroaren 23an rol jokoetan arituko dira.
Egitasmo honen helburua pantailarik gabeko aisialdi alternatiboa eta inklusiboa eta belaunaldien arteko hartu-emana sustatzea da. Ekimena gaur aurkeztu dute Zelai Arizti kultur etxean. Aurkezpenean Iñaki Mendiluze zinegotziak eta Sergio Mora Jolasenea elkarteko kideak parte hartu dute. Mendiluzek haur eta nerabeen ongizatea Zumarragako Udalaren helburuetako bat dela gogoratu du eta herrian Jolasenea bezalako elkarte bat izatea «harro egoteko modukoa» dela gehitu du.
Morak elkartearen sorreraren berri eman du. «Mahai joko modernoak gustuko ditugun bost lagun elkarrekin jokatzen hasi ginen, gure seme-alabekin batera. Onura asko dituztela jabetu ginen eta Jolasenea sortu genuen herritar guztiengana heltzeko. Astero 10-20 jolas berri sortzen dira, mota guztietakoak. Ondo pasatzeko balio dute eta, bide batez, sormena lantzeko, abilezia soziala garatzeko, arazoei aurre egiten ikasteko, herritarren eta senitartekoen arteko harremana indartzeko… Gero eta ikastetxe gehiagotan jolasen bidezko ikasketa bultzatzen ari dira».
Morak eta Mendiluzek adin guztietako herritarrak parte hartzera animatu dituzte.
